Þetta heldur áfram, maður er bara búinn í skólanum í dag, tveir íslenskutímar og búið!

Það var eitthvað mál með kennarana í dag! Samkvæmt stundatöflu byrjar bekkurinn í öðrum tíma á þriðjudögum. En í dag byrjuðum við ekki fyrr en í fjórða tíma og tímarnir sem eftir voru af deginum voru óvenju rólegir. Kræktir mér í eina tíu í síðasta tímanum, leikfimi, þegar ég hljóp 1200 metra á góðum tíma. Annars gerði nokkur fjöldi bekkjarsystkinna minna merkilega uppgötvun í dag þegar þau komust að því að til væri land sem héti Svartfjallaland. Sumir vildu reyndar ekki viðurkenna að það væri hluti af Evrópu því það tæki ekki þátt í Eurovision, gaman að þessu!

Gærdagurinn fór í það að sofa og blaða í gegnum námsbækur, sem sagt ekki mjög árangursríkur dagur. Dagurinn í dag er búin að vera ágætur það sem af honum er liðið t.d. frí í síðasta tíma en á móti var þýskupróf. Ég ætla að reyna að eyða deginum í það að lesa Newsweek og Íslandsklukkuna, sjáum til hvernig það mun ganga...